Комиа-роча зоология кывкуд

Исходник: Пемӧс нимъяслӧн кывкуд. Сыктывкар: Коми небӧг лэдзанін, 2001. 264 лб.

Авторыс: Ракин Анатолий Николаевич.

Тайӧ кывкудъяс пыртӧма нимъяссӧ гортса пемӧсъяслысь да вӧр-ваын олысьяслысь. Словарын сетӧма нимъяссӧ став сикас ловъя лолыслысь: йӧла пемӧсъяслысь, лэбачьяслысь, черияслысь, веглясьысьяслысь да косын и ваын олысьяслысь, гут-гагъяслысь.

Пемӧс нимъясысь ӧтдор словарӧ тшӧтш пуктӧма: кывъяс, кодъяс индӧны пемӧс вывтырлӧн аслыспӧлӧслун да туша тэчас вылӧ, кывъяс, кодъяс индӧны пемӧсъяслӧн пӧрысь-ӧ-том да эня-ая серти торъялӧм вылӧ, кывъяс, кодъяс индӧны пемӧсъяслӧн сям да оласног вылӧ, кывъяс, кодъяс индӧны пемӧсъяслӧн олан места да поздысьӧм аслыспӧлӧслун вылӧ, кывъяс, кодъяс индӧны пемӧсъяслӧн вуджӧмкӧд да вося кадколастъяскӧд йитчӧм вежсьӧмъяс вылӧ, кывъяс, кодъяс серпасалӧны пемӧсъясӧс сёян сикас серти.

Абу этша кывкудйын тшӧтш: пода видзӧмкӧд йитчӧм да скӧт висьӧмъяслӧн нимъяс, кывъяс, кодъяс йитчӧмаӧсь чери кыйӧмкӧд да рӧдмӧдӧмкӧд, вӧралӧмкӧд йитчӧм кывъяс.

Кывкудйын ставыс куим сюрс гӧгӧр кыв восьтӧд (словарнӧй статья), кызвын пемӧс нимсӧ босьтӧма литературнӧй кывйысь. Сёрнисикасъясысь пыртӧма медвойдӧр сэтшӧм кывъяс, кодъяс паныдасьлӧны коми гижысьяслӧн небӧгъясын, либӧ эмӧсь кӧ налы весьтасъяс матысса рӧдвуж кывъясын.

Юрнуӧдысь кывъяс пыдди вайӧдӧма кыдзи ӧтторъя, сідзи и некымын юкӧна нимъяс.

Кызвын словарнӧй статьяас сетӧма иллюстративнӧй примеръяс пыдди сёрникузяяс, кодъяс кутшӧмкӧ ногӧн серпасалӧны-гӧгӧрвоӧдӧны лыддьысьысьлы юрнуӧдысь кывъясыслысь вежӧртассӧ. Найӧс ёнджыкасӧ бӧрйӧма сэтшӧм гижӧдъясысь да небӧгъясысь, кӧні сёрниыс мунӧ вӧр-ва да пемӧсъяслӧн олӧм-вылӧм йылысь. Сёрникузяяссӧ кӧ сетӧма абу ставнас, дженьдӧдӧминас пуктӧма оръясян визь −−−, кывкуд тэчысьыслысь содтӧдъяссӧ пуктӧма пельӧса скобка пытшкӧ.

Уна вежӧртаса кывъяс словарын сетӧма кык ногӧн. 1) Кор гӧгӧрвоӧдан сёрникузяясыс эмӧсь быд вежӧртаслы, сэки налы, кыдзи и омонимъяслы, сиӧма торъя кыв восьтӧдъяс. Омонимъясысь торйӧдӧм могысь уна вежӧртаса нимлӧн юрнуӧдысь кывъясыс сетсьӧны вевдор помас лыдпас пуктӧмӧн. 2) Омонимъяс сетӧма торъя статьяясӧн, но  серпасалан сёрникузяясыс кӧ абуӧсь либӧ эмӧсь, но абу став вежӧртасыслы, сэки найӧ вайӧдсьӧны ӧти словарнӧй статьяын.

Вель уна кыв восьтӧд помын вайӧдӧма лӧсялана коми-пермяк да удмурт пемӧс нимъяс. Юрнуӧдысь кывъяслысь да рӧдвуж весьтасъяслысь гижанногсӧ сетӧма Коми орфографическӧй словарь (Сыктывкар, 1985), Коми-пермяцкӧй орфографическӧй словарь (Кудымкар, 1992), Удмурт орфографическӧй словарь (Ижевск, 1984) серти. Коми-пермякъяслӧн гижанногыс миян кодь жӧ, удмуртъяслӧн торъялӧ некымын шыпасӧн: дж пыдди налӧн ӝ, дз пыдди ӟ, тш пыдди ӵ, і пыдди ӥ.

КЫВЪЯСЛӦН ДА СЁРНИСИКАСЪЯСЛӦН ДЖЕНЬДӦДӦМ НИМЪЯС

вв. — эжва катыд сёрнисикас
вс. — сыктыв катыд сёрнисикас
вым. — емва сёрнисикас
иж. — изьва сёрнисикас
кп. — коми-пермяк кыв
л. — луза сёрнисикас
лет. — летка сёрнисикас
лл. — луза-летка сёрнисикас
нв. — эжва кывтыд сёрнисикас
печ. — печора сёрнисикас
скр. — сыктывкар берд сёрнисикас
сс. — шӧр сыктыв сёрнисикас
уд. — удора сёрнисикас
удм. — удмурт кыв

МУКӦД ДЖЕНЬДӦДӦМЪЯС

важм. — важмӧм кыв (устаревшее слово)
видз. — видзӧд (смотри)
вк. — выль кыв (неологизм)

Кывкудлысь электроннӧй форма лӧсьӧдіс Кожевина Елена.

Кол-во терминов: 2902
Кол-во страниц: 59