Коми видчанкывъяс

1йиа бугыль

кӧдзыд сьӧлӧма лёк морт Сӧмын овнысӧ тай дзугыль, Ставсӧ — ӧтувъясӧ — чаш! Коді вӧлі йиа бугыль, Сэтшӧмыслы воссис гаж (Г. Юшков)

2йиа кӧзӧд

кын сьӧлӧма, сьӧлӧмтӧм, кӧдзыд морт — А кӧдзалам кӧ ӧта-мӧд дінӧ?— Некытчӧ нин тэныд кӧдзавнысӧ, йиа кӧзӧдлы! — муртса эз горӧд Павел. — И абу ме тэныд яй туша, сылӧмысь кӧ нин полан! — вӧрзис да ӧддзис восьлавны, но виччысис на чукӧстӧм [Галинасянь] (Г. Юшков)

3йирктӧм пывсян

кужтӧм, туйтӧм морт Иван. Ок тэ, йирктӧм пывсян! Ломты кӧть эн, он и шонавлы (Колялы кывъяс) (Г. Юшков)

4йӧв кень сёйысь

зырымбедь, абу верстьӧ морт / молокосос, сопляк (КРК) — Ак, йӧв кень сёйысь!.. Пӧрысь йӧзкӧд косясян?! — Ог косясь, а мездыся. — Владик бӧр пуксис косилкалӧн люлькыд пуклӧс вылӧ... (В. Безносиков)

5йӧгар

скр. вина гаг, пъянник, кабатскӧй йӧгар (ССКЗД, КСК) Тэ менӧ эновтан кӧ, донаӧй, Шог вӧсна йӧгарӧ ог пӧр (А. Некрасов)

6йӧгӧза

дзирня, вывті тэрмасьысь морт ӦГАШ БАБ. Чӧв, йӧгӧза, нинӧм абусӧ... То гӧсь локтӧ, учительыд, примит (паныд кывъяс Устин вокыслы) (Н. Куратова)

7йӧз киӧн биа ӧгыр куралысь

дась вылын олысь, йӧз сайын олысь — Лазарь Каганович моз пига мыччӧдлан?.. А тэ вед ичӧтик Каганович и эм, бур йӧзлысь сӧстӧм вирнысӧ юысь! Йӧз киӧн биа ӧгыр куралысь (В. Безносиков)

8йӧй

1) бӧб, вежӧртӧм / глупый, бестолковый 2) йӧй, мӧмӧт / дурак (КРК) Менам со киясӧй муртса петшӧрассисны, и то кутшӧма зӧлитӧ, а ладинечыс кыдзи терпитӧ? Ок, йӧй ме, зьвер...» (Н. Мальцев) А шоперыс коми вӧлӧма, броткыштіс сӧмын: «Быдсяма йӧйыс тані ветлӧны» (В. Попов)

9йӧй али прӧсуж

абуджык лючки морт, йӧй нисьӧ абу — Йӧй али прӧсуж ме, — сьӧлыштіс Илья. — Вӧтлыся вуджӧръяс бӧрся (В. Юхнин)

10йӧй вужля

эй. Нэмдін бӧб, вежӧртӧм, мӧмӧт (юӧртіс М.С. Мамонтова)

11йӧй мегар

мӧмӧт, йӧй, меж кодь — Да, былялӧм бугыль, кысь миянлы справкаыс выходнӧй луннас? — дзикӧдз нин ярмис Сюзь Митрей, кватитіс киас кузь воропа зыр. — Нуӧд буди гу дорас, йӧй мегар, а то колмас ӧтик морт пыдди кыкӧнӧс дзебны! (И. Торопов)

12йӧй катша

вежӧртӧм больгысь-сӧрысь морт ЕЛЕНА ПЕТРОВНА (видлӧ пульссӧ.) Йӧй катшаяс!... Фотеевнаыд ловъя да! Сьӧлӧмыс со діпкыны кутіс, синъяссӧ восьтіс и!.. (В. Безносиков)

13йӧй кычан

нинӧм гӧгӧрвотӧм морт — Мыйыськӧ? — Вот йӧй кычаныд! Видлы нылыдкӧд окасьны да маласьны, кытчӧ сэсся киыд лэччӧ. А оз позь коссьыс улӧджыксӧ... (Г. Юшков)

14йӧй лешак

вежӧртӧм мути, видчанкыв ЕЛЕНА ПЕТРОВНА. ..Йӧй лешакъяс жӧ эськӧ да!.. Но, ме сэсся муна, Павел Петырлы колӧ на укол вӧчыштны (В. Безносиков)

15йӧй нисьӧ прӧсуж

йӧйоват, йӧюк, абу лючки (ССКЗД, КСК, КК) Ветерок (часӧвӧйлы). Коді татшӧмыс? Часӧвӧй. Чӧртыс тӧдӧ. Йӧй нисьӧ прӧсуж кутшӧмкӧ. Конвойнӧйлысь чуньсӧ курччис (Н. Дьяконов)

16йӧйнӧш

вывті йӧй Руч ку пась ог сет; И ог пӧръясь, И ог бӧрйысь, Йӧйнӧш сайӧ пет! (И. Куратов) Ассьыд чужтӧм-быдтӧмторъястӧ бокӧвӧй мортыдлы оз удтывлыны, но суседкасьыс Ӧнись нинӧм оз дзеб. — Эбӧснысӧ песыштісны. Ок-к, эськӧ! Йӧй нӧшъяс!.. (В. Безносиков)

17йӧй руа

йӧйоват, йӧюк, абу лючки (КК) — Ме том дырйи йӧй руа на вӧлі да эг лысьты вайӧдны татчӧ Марьяӧс, а тэ кыдзи? (В. Куратов)

18йӧйсьыс-йӧй

вир йӧй, вач йӧй, дзик йӧй (КК) Унтер. Тэ ногӧн ме дзик йӧй? Ӧгыр Анна. Йӧйсьыс йӧй! (Н. Дьяконов)

19йӧйталысь выжыв

йӧй / сумасброд (КРК) Лыдди ме тайӧс и мӧвпала: эз прӧстӧ гӧтыр менӧ шу выжыласьысьӧн да йӧйталысьӧн (Н. Игнатов)

20йӧйтор

бӧб сяма, йӧйоват морт ГРИШ (скӧра). Но, сё матьӧ! Но и Тоня, йӧйтор! Кыдз нӧ позьӧ вина вийӧдан аппарат би вылӧ кольны! Тьпу! Со и ӧзйӧма (А. Вурдов)

21йӧй ыж

дзикӧдз йӧй Мый нӧ лоинныд, йӧй ыжъяс? (В. Чисталев)

22йӧй ылӧг

йӧюк Йӧй ылӧг, тэнӧ ӧд пӧрйӧдлісны (КК)

23йӧй юр

дзик вежӧртӧм морт «Йӧй юр ме, йӧй юр! — ӧні асьсӧ видіс Геня (Я. Рочев)

24йӧйялысь

1) пӧрысь выжыв / сумасброд (КРК) 2) юродивӧй морт Мортыс, код гӧгӧр сулалісны ученикъяс, вӧлі йӧйялысь (юродивӧй); ичӧтик тушаа, аршынӧн-джынйӧн судта, видзӧдлан кӧ сы вылӧ, пырысь-пыр жӧ серамыд петас (В. Лыткин)

25йӧлэга

изьв. дзирня, жӧдза, дурпоп (ССКЗД, КСК)

26йӧнгыль

зырымбедь, подув вежӧртасыс йӧг, кучикын яй гӧрӧд — Выныс — коллектив сайын... И повныс нинӧмысь. Ярӧыд ичӧт на йӧнгыль... (В. Безносиков)

27йӧргаль

дзирня / вертлявый человек, непоседа (КРК)

28йӧюк

бӧб сяма, йӧйоват морт / глупенький, глупыш (КРК) Недыр сулалӧм бӧрын Николайӧдз пемыдсьыс кыліс ныв гӧлӧс: — Йӧюк тэ! Ӧдва тӧдан мортсӧ, а радейтӧм йылысь нин мӧвпалан! (М. Игнатов) — Йӧюк тэ, Вера, дзик йӧюк! — шӧпкӧдыштіс Илья. — Сосси ӧмӧй тэысь, позис кӧ (В. Юхнин) «Колӧма жӧ Виталейыскӧд матӧджык тӧдмасьны, — зон мунӧм бӧрын кокниа ышловзьӧм мысти кутіс мӧвпавны Шура. — Йӧюк ме, йӧюк...» (А. Попов)