Коми видчанкывъяс

1сюзь бугыль

мисьтӧм чужӧма морт (КК) Марина. Он мӧй аддзы? Ӧльӧксейлӧн свӧякыс локтіс да вежӧктӧ. Аннаӧс сюзь бугыльыд, пинялӧ: пинялӧ, дзебсясян пӧ меысь? (В. Леканов)

2сюзь син

мисьтӧм чужӧма (КК) «Но, этта, кытчӧ нӧ лыйин, сюзь син? (А. Вурдов)

3сюн сёй нӧш

вач йӧй, бӧб (КК) Мортлысь юр вежӧр, ав, мывкыд петкӧдлысь ФЕ-яс пиын торъялӧны: а) ’йӧй, бӧб, тӧлктӧм’ понятие тӧдчӧдысьяс, шуам: пож юр, нитш (жуг) юр, гын нӧш кодь, юр вемсӧ катша-рака кокалӧма, сюн сёй нӧш кодь, гын юр, нӧш юр, кын сюръя кодь и с.в. (А. Карманова)

4сюра

чӧрт, мор, мути / чёрт, леший сюраяс мед нуасны! (КРК) — Вешйы, пиыд дивитас, — Калиналы чужӧмас кинас небыдика шлапкис Ануш да тшӧтш сераліс: — Сюраясыс тэнӧ оз на нуны! (Я. Рочев) Катя. Бара кодӧскӧ новлӧдлӧ тані? (Восьтыштӧ ӧшиньсӧ.) Кутшӧм сюра нин сэні? (Нёбдінса Виттор)

5сюра антикрист

1) ен тӧдтӧм, грека морт 2) мустӧм, дӧзмӧдысь морт — Кор нӧ сюра антикристъясӧс сувтӧдасны, бырӧдасны! — векыштчӧмӧн ёрччыштіс Проньӧ дед, лёкысь швыркнитіс-шыбитіс тӧчитан косасӧ (Б. Шахов)

6сюра антус

мустӧм, грека морт Ветерок (кучкӧ кулакнас пызанӧ). Сюра антус! Тэ тӧдан, мыйӧн тайӧ ӧвтӧ? (Н. Дьяконов)

7сюра бес

мустӧм морт Марья. Сюра бесыс тіянӧс гӧгӧрвоас... Быд пӧлӧс йӧзыс ветлӧ-мунӧ да... (Н. Дьяконов)

8сюра-бӧжа сӧтана

ёна мустӧм морт — Тьпу, сюра-бӧжа сӧтана! — ёрччис Ёгор да пинжак соснас чышкаліс нюйтӧн резӧм чужӧмсӧ (В. Безносиков)

9сюра дявӧл

ёна мустӧм морт, пемӧс Эновтлас Тикӧн мӧс стадасӧ да кыдзкӧ асьсӧ кылӧ вӧльнӧйӧн — оз на пӧ найӧс, сюра дявӧлъясӧс, сӧтанаыс ну (Н. Мальцев)

10сюра кукань

туйтӧм, ичӧт тӧдчанлуна морт — Сюра куканьӧ! — серӧктіс гӧсть. — Тайӧ харейыс миян пастуклӧн. Зудтӧм Габӧлӧн (С. Терентьев)

11сюра лешак

1) ёна мустӧм морт 2) видчанкыв — Сюра лешак тай! — вӧр тырнас сьӧласис Паш Вась ёртыслӧн мунӧм мысти (А. Ульянов)

12сюра мӧмӧт

ёна бӧб морт, пемӧс — Он ӧмӧй кыв? Сюра мӧмӧт! Зіля гортӧ! — тракйис-кыскис кӧзаӧс скӧрмӧм зонка (Э. Полякова)

13сюра мӧс

йӧзкӧд лӧсявтӧм морт, быдӧнкӧд лӧгасьысь Сюра мӧс моз ставсӧ люкалін = ставныскӧд лӧгасин (КК)

14сюра сӧт

ёна мустӧм морт, пемӧс Сэсся салдат восьтіс алтарӧ пыран ӧдзӧссӧ. Сэн тыртӧм. — Ак тэ, сюра сӧт! (И. Пыстин) — Тьпу!.. Сюра сӧт! — горӧдіс Владик да пондіс халат соснас чышкавны лякӧссьӧм банбоксӧ (В. Безносиков)

15сюра сӧтана

1) ёна мустӧм морт 2) видчанкыв Сэсся мамуляыс этшсьыс петіс да беддялӧм польӧ моз чирӧстіс: — Кырсач!.. Юрситӧ нетшка!.. Чужӧмтӧ парсала!.. Господьӧ дай енмӧй, быдӧнлӧн нормальнӧй челядь, а миян? — и шлюпкысис камодбокса улӧс вылӧ да ырӧстӧмӧн бӧрддзис: — Сюра сӧтана-а! (В. Безносиков)

16сюра чӧрт

ёна мустӧм морт СЕМЁНОВНА. Зять, сюра чӧрт! (Кутлӧ мӧдарбоксяньыс) (Е. Макарова)

17сюрӧстӧм морт

кутӧдтӧм, тышкӧ пырысь морт Сюрӧстӧм мортӧс успаньвыв пуксьӧдны = косясьысь мортӧс лӧньӧдны (КК)

18сюртӧм бес

ёна мустӧм морт Марья. Кара-аул!!! Отсалӧй!!!! Кузь юрсиа сюртӧм бес пач под улӧ пырӧма!.. (Кыскӧ юрсиӧдыс Пӧдӧм гӧлӧсӧс). Ноко петав, петав, кикимера! (Н. Дьяконов)

19сюртӧм сӧтана

ёна мустӧм морт ЗАРЕМА (серӧктӧ). Радейтчан инструментыд ныжмис?.. КӦСЬТА (тшапа). Будь спок! Ковмас кӧ, лэчмывлӧ на!.. А бабаясыд — сюртӧм сӧтанаяс! (В. Безносиков)

20сюртӧм чӧрт

мустӧм морт Ярмӧм нывбаба сы водзын пескыльтчис, бергӧдчис мышнас да кинас шлап-шлапкерис аслыс бекъяс: — Первой тайӧс окав, сюртӧм чӧрт! (Я. Рочев)